[170122]李準基晒半鹹半淡嘅廣東話預早港迷恭喜發財

http://hk.apple.nextmedia.com/enews/realtime/20170122/56209142
攝影：仇志德(蘋果日報)
韓版《步步驚心》男星李準基今晚喺亞博舉行亞洲巡迴演唱會2017香港站，場外放置好多李準基嘅相，好多粉絲排隊同紙牌自拍，亦有李準基演唱會紀念品發售，包括$120手燈、$120口罩、$100護照。場內，亦有粉絲們派發印有李準基樣嘅旗仔同紅心。

大約於晚上8時10分，現場就播放聲帶，李準基以半鹹半淡嘅廣東話：「大家好，歡迎大家嚟李準基亞洲巡迴演唱會，我嘅baby準備好未呀？」全場粉絲high爆！

帶上面罩嘅李準基終於出場，仲熱舞一番，其後除下面罩唱歌《LOST FRAME》、《Born Again》、《J Style》，全場粉絲企晒起身，揮動手上嘅螢光棒。當李準基唱完後，即向台下粉絲揮手，全場粉絲以韓文大叫：「李準基！」李準基透露翻譯話：「真係嚟咗好多人！」佢再繼續話：「what's up Hong Kong，覺得今晚點？感唔感覺到我心跳？我係你哋嘅李（種）基。」之後又用國語講：「歡迎大家來到這裡。」再以廣東話講：「好耐冇見，你哋好嗎？你哋好呀，你哋好靚呀。」之後向台下粉絲送上飛吻，再用廣東話話：「恭喜發財！」

之後再亦以國、英、韓文講「新年快樂！」李準基又表示今次為咗嚟香港，準備咗好多嘢，又話香港粉絲仲係咁歡迎佢，令佢好感動，並以廣東話講咗3次：「我好幸福！」然後透過翻譯話：「我好耐冇嚟香港，所以我好開心，要同大家玩番一晚，左右兩邊觀眾係咪好難見到我，我會好努力兩邊走，所以唔使擔心。」又叫粉絲要起身，不過要注意安全。